Naan Brood

Bestanddele

·                       7 g aktiewe droë gis

·                       235 ml warm water

·                       50 g wit suiker

·                       45 ml melk

·                       1 geklitste eier

·                       10 g sout

·                       615 g brood meel

·                       6 g gekapte knoffel (Party resepte reken dis opsioneel. Hulle moet seker mal wees).

·                       55 g gesmelte botter

 

Metode

1. Los die gis op in bietjie warm water in ‘n groot skottel. Laat staan dit vir so 10 minute totdat dit skuim. Roer die suiker, melk, eier, sout en genoeg meel vie ‘n sagte deeg in. Knie vir 6 – 8 minute op oppervlakte met meek bestrooi, tot die deeg mooi glad is. Plaas dit in ‘n bak met olie gesmeer, bedek met ‘n klam lap en sit dit eenkant om te rys. Na sowat ‘n uur behoor die deeg se volume verdubbel het en is dit reg.
2. Slaan die deeg plat en knie die knoffel in. Knyp bietjies deeg omtrent so groot soos ‘n gholfbal af, rol in balletjies en plaas op ‘n skinkbord. Bedek dit weer met ‘n klam lap en lat rys tot dubbel hul grootte – so 30 minute.
3. Verhit solank die oond baie warm so 230 grade met die grill aan.
4. Roll die bal deeg plat in ‘n dun sirkel of enige vorm wat jy wil. Verf die bokant met die botter en plaas in die oond vir so 2-3 minute, of tot ligbruin. Verf die ander kant met botter en bak dit ook tot ligbruin. Bak al die balle so totdat die naan gereed is.

 

Genoeg vir 14 porsies.

ASPETAT SE ROGAN JOSH

Dis herfs. Elke dag lyk die berge anders. Die groen word stadig omvorm in ‘n ontploffing van bruin, rooi, pers en geel kleure met kombinasies wat nêrens anders in die wêreld dieselfde is nie.  Die populiere en die treurwilge word geel. Dis hierdie kleure en temperature wat dan my Appelliefie, dis nou Aspetat te veeleisende wederhelf, smaak kliere begin prikkel en sy vra vir kerrie! Nou nie basaar kerrie nie. Dit kan ‘n mens op Paasnaweek by die vlooimark op die plein by die kerk se tent gaan koop. Nee,  ‘n mens soek Indiese kos. Met Naan brood of Roti. Met Basmati rys.

 

Die meeste mense skrik vir hierdie kerrie ding. Hulle is bang vir brand. Dis nie nodig nie. In Indië is daar nie so ‘n ding soos kerrie nie. Die woord is eintlik Engels van oorsprong en gebaseer op die Tamil woord “kari”, wat swart peper beteken. Dit is ‘n term wat vele soorte Indiese kosse beskryf, veral dié wat in sous gekook word. Disse in Indië word eerder vernoem na die kombinasie van speserye wat gebruik word (“rogan josh”), of na die metode van voorbereiding (“koma”, “briyani”, “do piazza”) of na die hoof bestanddele (“saag”, “aloo gobi”). Kerrie poeier bestaan nie. Die naaste daaraan is miskien masala, wat maar net ‘n naam is vir enige mengsel speserye. Party disse bevat baie chillies en kan jou bek brand. Die meeste het niks in wat brand nie.

 

Hierdie resep kan met beesvleis, hoender of vis gebruik word. Dis ‘n maklike manier om te begin in die wonderwêreld van Indiese kookkuns.

 Bestanddele:

 

800 g rump steak

4 medium grote uie

8 tamaties

1 eetlepel mosterd saad

1 eetlepel sesame saad

2 teelepels borrie

2 teelepels paprika

3 eetlepels garam masala

1 gekapte chili (as jy soos ons van warm goed hou sit meer by)

4 huisies fyngekapte knoffel

2 eetlepels sonneblomolie

1 blikkie kokosneut  melk

‘n Hand vol vars koljander blare

 

 

Metode:

 

1.                  Maak die uie fyn in die voedselverwerker, of rasper dit, en sit eenkant.

2.                  Verwyder die tamaties se skille daardeur eers in kookwater vir ‘n paar minute en daarna in yswater te sit. Maak die tamaties fyn in die voedselverwerker, of rasper dit, en sit eenkant.

3.                  Verhit die sonneblom olie in n lekker diep braaipan. Moenie olyfolie gebruik nie. Die sonneblomolie word warmer en bring die geure van die speserye beter na vore.

4.                  Sny die vleis in blokkies, maak dit bruin in die olie en sit eenkant.

5.                  Braai eers al die sade in die olie net vir so ‘n minuut.

6.                  Voeg die garam masala en borrie by en roer vir nog ‘n minuut.

7.                  Voeg die uie, knoffel en chilies by en roer die speserye deur.

8.                  Voeg die tamaties by en roer deur. Maak die pot toe en verminder die temperatuur. Laat dit nou rustig vir so 30 minute prut. Ek proe maar so elke 10 minute. In ’n stadium kom al die geure bymekaar en sê sie kerrie hy is nou reg vir die vleis.

9.                  Voeg die vleis by en laat nog prut tot sag.

10.             Voeg die kokosmelk en die koljander blare by en roer deur. laat staan vir nog 5 minute en bedien saam met Basmati rys en Naan brood.

RAVIOLI GEVUL MET SPINASIE EN BLOUKAAS IN ‘N TAMATIE ROOMSOUS

Bestanddele

 Vir die Ravioli:

 400 g gesifte meelblom

4 eiers

 

Vir die ravioli se vulsel

 Spinasie. Genoeg om omtrent ‘n koppie vol te maak nadat dit gekook het.

1 of 2 Chillies

Omtrent so 80 g bloukaas.

 

Vir die tamatie roomsous.

 Omtrent so 8 tamaties

1 ui. (Ek verkies die Spaanse Rooi ui as jy dit kan kry)

1 eetlepel olyfolie

250 ml room

2 huisies knoffel

‘n knypie origanum

‘n Groot hand vol vars basilie blare.

Sout en peper

‘n Koppie witwyn.

 

So maak mens

 

Ravioli vulsel.

 

1.                  Snipper die spinasie en die chillies in die voedselverwerker. Dit moet nog grof wees. As jy ‘n sissie is, sny eers die chilli in die lengte en verwyder die pitte.

2.                  Kook met ‘n bietjie water en ‘n bietjie sout vir so 10 minute.

3.                  Gooi die oortollige water af.

4.                  Brokkel die bloukaas in en meng goed.

5.                  Sit eenkant.

 

Ravioli

 

‘n Mens het nie ‘n pasta masjien nodig nie maar dit help.

 

1.                  Plaas die meelblom en eiers in die menger en meng dit totdat ‘n taai deeg vorm. As jy nie ‘n menger het nie, plaas die meel in ‘n hopie op die tafel. Maak ‘n holte in die middel en breek die eiers daarin. Meng en knie dan die deeg totdat jy die tekstuur reg kry. Die growwigheid van die meel moet nie meer in die deeg wees nie dan is dit reg.

2.                  Draai die deeg to in kleefplastiek. Plaas in die yskas vir ten minste ‘n half uur. Ek verkies 2 ure of meer.

3.                  As jy ‘n pasta masjien het, rol nou die deeg uit tot op dunste stelling. As jy nie ‘n masjien het nie kry die koekroller en ghries jou elmboë. Rol die pasta uit tot so 1 mm dik. Probeer om net in een rigting te rol.

4.                   Sny dan vierkantige blokke so 5 cm X 5 cm. Plaas ‘n teelepel vol van die vulsel in die middel van die helfte van die blokke.

5.                  Vat ‘n kwassie en water en maak nou die ander blokkie versigtig bo-op. Pasop dat jy nie die vulsel platdruk nie. Seel nou die twee blokkies aanmekaar met jou vingers of jou handpalm as jy weet hie. Probeer om soveel lug as moontlik uit te druk.  Onthou deurgaans om meel oor die werkoppervlak te strooi. Dit sal keer dat die pasta nie vaskleef nie.

6.                  Plas jou voltooide ravioli blokkies in ‘n bak met meel bestrooi. As jy lae wil pak gebruik waspapier tussen die lae. En moenie skaam wees met die meel strooi nie.

 

Tamatie Roomsous

 

1.                  Plaas die tamaties in kookwater vir so halfminuut en plaas dadelik oor yswater. Haal dan die skil af.

2.                  Soteer die ui tot sag.

3.                  Kap die knoffel fyn en braai voeg by die uie.

4.                  Sny die tamaties by die uie.

5.                  Gooi ‘n koppie wyn by en kook tot dit ‘n vloeistof vorm.

6.                  Voeg die room by en sout en peper na smaak.

 

Gooi nou die hele spul in ‘n goot bak. Skep op en geniet!